7 сәуірде Астанада классикалық шахматтан әлем чемпионаты басталады, деп хабарлайды Қазақстан шахмат федерациясының баспасөз қызметі.
«2023 жылдың 7 сәуірі мен 1 мамыры аралығында Астанадағы St Regis қонақүйінің киіз үйінде шахматтан әлем чемпионы атағы үшін кездесу өтеді. Ян Непомняхтчи (ФИДЕ) мен Динг Лирен (ҚХР) чемпиондық атаққа таласады» делінген хабарламада.
Астанада өтетін әлем чемпионаты 14 ойыннан тұрады. Тең болған жағдайда қарсыластар плей-оффты рапидте ойнайды.
Турнирге ФИДЕ президенті Аркадий Дворкович, шахматтан 14-ші әлем чемпионы Владимир Крамник, шахматтан 15-ші әлем чемпионы Виши Ананд, шахматтан әйелдер арасындағы 4 дүркін әлем чемпионы Хоу Йифан, сондай-ақ гроссмейстерлер - Даниил Дубовт, Виорел Бологан, әйелдер гроссмейстері, Латвияның бұрынғы экономика министрі және қаржы министрі Дана Рейзнице-Озола, тағы да бірқатар атақты қонақтар келеді деп күтілуде.
Чемпионат аясында қонақтар бірқатар семинарлар мен синхронды ойындар өткізеді. Шара барысында Қазақстан Республикасы мен әлемнің әйелдер құрама командалары арасында (рапид және блиц) халықаралық матч, сондай-ақ 14 жасқа дейінгі ұлдар мен қыздар арасында Future World Champions – 2023 балалар турнирі өтеді. Бұл кезеңде 2023 жылғы Қазақстан Республикасы балалар кубогының финалына қатысуға үміткерлер анықталады.
«Алдағы әлем чемпионаты шахмат әлемі үшін де, Қазақстан үшін де маңызды оқиға. Бүгінде шахмат елімізде трендке айналды. Біз шынымен де жылдам өсіп келе жатқан қызығушылықты көріп отырмыз. Осыған байланысты Қазақстанда шахматты дамытудың, оның ішінде өскелең ұрпаққа арналған ауқымды бағдарлама қабылданды. Қазір федерацияның алдында шахматты дамытуды түбегейлі жаңа деңгейге шығару, жас шахматшыларға мүмкіндік беру және жаңа таланттардың шығуына негіз жасау міндеті тұр. Матчтың бізге сеніп тапсырылуы Қазақстанның әлемдік спорттағы маңыздылығының және біздің зор әлеуетімізге деген сенімінің дәлелі. Алдағы жылдары біздің спортшылар жаңа табыстарға қол жеткізетініне сенімдімін, біз қазақстандықтардың жеңістерін мақтан тұтамыз», - деді Қазақстан шахмат федерациясының президенті Тимур Турлов.
Еске салайық, бұған дейін өткен жылдың 31 қазанында қазіргі, 16-шы әлем чемпионы Магнус Карлсен классикалық шахматтан әлем чемпионы атағын қорғаудан бас тартқан болатын. Осыған орай, 2022 жылғы үміткерлер турнирінің жеңімпазы Ян Непомниахтчидің қарсыласы турнирде екінші орын алған Динг Лирен болды. Бұл спортшылар Халықаралық шахмат федерациясының (FIDE) әлемдік рейтингінде екінші және үшінші орындарда тұр. Нәтижеге қарамастан, бұл кездесу шахмат тәжінің жаңа, 17-ші иесінің есімін анықтайды.