Цифрлық даму, инновациялар және аэроғарыш өнеркәсібі министрі Бағдат Мусин елордадағы халыққа қызмет көрсету орталығында болып, өткен айда орнатылған жаңа «құжаттау терминалдарын» көрді.
«Бүгін мен Астанадағы Керей Жәнібек Хандар көшесінде орналасқан Халыққа қызмет көрсету орталығында болдым, онда жеке куәлік пен төлқұжат беретін терминалдардың жұмысын тексердім» деп жазды Мусин өзінің Telegram-арнасында.
Министрдің айтуынша, кейбір аймақтарды қоспағанда, құрылғылар «толықтай жұмыс істеп тұр».
«Терминал қызметін әр өңірден келген адамдар пайдалана алады, алайда бұл қызметтер Алматы, Қарағанды, Түркістан және Шығыс Қазақстан облыстарының тұрғындары үшін әлі қолжетімді емес. Бірақ бұл мәселе бір айдың ішінде түзетіледі. Ішкі істер министрлігімен бірлесіп, тиісті жұмыстарды жүргізіп жатырмыз.
Сондай-ақ, жақын арада мұндай терминалдар барлық облыстық халыққа қызмет көрсету орталықтарында пайда болады. «Азаматтарға арналған үкімет» КЕАҚ-ның алдына қойған міндеті осы», - деп уәде берді Бағдат Мусин.
Цифрлық даму, инновациялар және аэроғарыш өнеркәсібі министрі Бағдат Мусин терминалдардың көмегімен тұтынушылар қызметке кезексіз тапсырыс бере алатынын, сондай-ақ құжат үшін жақсы суретті өз бетінше таңдай алатынын айтты. Мемлекеттік орган қызметкерлерінің уәделері бойынша құжат беру жұмысы 10 минуттан аспайды.